lunes, 13 de diciembre de 2010

::: NOVEDÁ::: DINGURINDAINES...

::: ¿Una xata rosa y un merucu azul? ¿Seis sapos gordos que soplen les flautes? ¿La rana Taresa y el sapu Ramón que-y tienen manía a Paco'l fartón? ¿Dos gatos que viven debaxo una escalera?
Anque pueda paecer una llocura, tamos ante una torrentera d'imaxinación, humor, ritmu y color nel nuevu llibru qu'espubliza Cristina Muñiz Martín cola editorial asturtOOns y dibuxos d'Enrique Carballeira.
'Dingurindaines, poesíes pa neños' repasa un garrapiellu de personaxes tan fantásticos como un elefante que vive na Pola, una Xana que canta una nana, o una neña, Celina, a la que nun-y presta dir a escuela y fai trampes pa paecer enferma...
Con esti títulu, l'autora avérase a la lliteratura ilustrada y failo con un llibru que, de xuru, va prestar a neños y grandes. Ye'l primer pasu de Cristina nun xéneru nel qu'espublizará nueves obres nos prósimos meses.
El llibru tamién ye'l primer títulu de la nueva coleición qu'asoleya asturtOOns, 'EL GATU PIRATA'. Llibros en formatu cuadráu, de 22x22 centímetros y en tapa dura.

::: Cristina Muñiz Martín nació en Xixón. Recuérdase a sí mesma, de la mano de so güela, colos güeyos fincaos nos cuentos troquelaos qu'escolingaben d'una cuerda, prendíos con pinces de la ropa, del cristal de la puerta de l'antigua llibrería Central, na cai Corrida. Cuentos que la convidaben a abrilos y descubrir los dibuxos y les lletres qu'escondíen dientro. Ellos, los cuentos, fueron los sos meyores xuguetes de neña. Pasáu el tiempu, munchu tiempu, decidió escribir les sos propies hestories. Poco a poco, foron saliendo los relatos de Onde pisen poques güelles, El buscador d'hestories y Kárias. Tamién la novela Ventiocho díes o los monólogos d'Ente muyeres o Pa echar unes rises. Fixo igualmente obres de teatru y guiones pa radio.
"Y por fin llegó'l turnu d'una cosa que me facía muncha ilusión: escribir pa rapacinos y contar cola ayuda d'un dibuxante que diere vida a les mios pallabres. Asina nació DINGURINDAINES, POESÍES PA NEÑOS, un llibru de poesíes con ilustraciones d'Enrique Carballeira".