martes, 21 de septiembre de 2010

Xilu fala n'inglés



::: El llibru XILU TIEN MIEU A LA NUECHE d'Enrique Carballeira y espublizáu n'asturianu por ASTURTOONS nel añu 2008, acaba salir a la venta al mercáu americanu y internacional en llingua inglesa y a través de la plataforma de venta de llibros electrónicos y aplicaciones de la empresa Apple, pa dispositivos como'l Iphone, Ipod y el nuevu Ipad. Esta publicación faise gracies a la collaboración ente la editorial asturiana y la norteamericana PICPOCKET BOOKS, especializada nesti tipu de ebooks, qu'amesten los dibuxos cola música, efeutos y narración.
L'adautación de la historia foi fecha por ASTURTOONS col asesoramientu de la responsable editorial de PICPOCKET BOOKS, Lynette Mattke. Nesta adautación también se cambió'l nome del protagonista, Xilu, por unu más afayadizu pa los llectores en llingua inglesa. El títulu nesti idioma ye MICO THE MOUSE WHO WAS AFRAID OF THE DARK.
El llibru cuenta la historia d'un mur al que-y presta oyir les histories que so ma-y cunta depués de cenar. Magar d'ello, nun llega a disfrutales del too, porque sabe que depués tendrá que dir a durmir solu al so cuartu, y la nueche apavóralu abondo.